Zi Giuspin - carraraonline.com

Sezione a cura di Mario Volpi
Vai ai contenuti

Zi Giuspin

Sol p'r noialtri
File Audio del Racconto

Spetta/le Redazione
I regimi dittatoriali non sono deleteri solo perchè privano la popolazione della libertà individuale e di quella economica, ma sopratutto perchè osteggiano, quasi sempre in maniera violenta, chi si oppone a loro, magari solo con la forza delle idee. Questo racconto è  tratto da una storia vera, anche se io l'ho un pochino romanzata per non far riconoscere il protagonista. Quando andavo alle elementari vi era questo tizio che viveva di espedienti, e con la testa non del tutto a posto, noi lo prendevamo bonariamente in giro. Solo molti anni dopo venni a sapere che era stato un professore universitario, e che era diventato "strano" per aver  subito molti anni di carcere duro per essersi opposto al regime del ventennio.


22 Luglio 2013

L’altr dì, dop tant temp, a son passat d’ndov al pasav na volta la marmifra, e squasi senza acorz’rm i me oci i sen posati sul casutin d Zi Giuspin ‘l magnan. O mei ‘ndov na volta aier il casutin, p’rcos mo a ni è pu nient, neanche un segn, tut pulit e liss com la man d’un pret. Quand la marmifra al viazav ancamò, drent al casutin ai stev ‘l caselante p’r reprir e ciod’r le stanche del pasag a livel, po quand adè falita, a d’avev piat Giuspin p’r fari la so oficineta. ‘L casutin d Zi Giuspin, ier p’r noialtri fanti com ‘l port p’r ‘l barch, o la cantina p’r ‘l barozar, ‘nsoma ier ‘l post ‘ndov artrovars tuti i di p’r meters d’acord sul dafars. Se zocar a bombia, o a nascundin, o andar a tirar a le zortede lungh ‘l mur dla segheria, o se a s cunviniv far la guera a queli dla Ragia. Zi Giuspin ier un vecet tut peda e osi, con i v’stiti che i cascavan d’ndoss com a un spaventa pasri, ma ier svelt e visp com un card’din. Ier semp’r a pistar su l’ncudina con un marted che segond me i avev pu ani che il prim top del Cafaz, tut scalcagnat, r’nversat com na rosa spampanata. I colpi dati un po sul fer rovent, e un po su l’ncudina, i parev’n musica, e noialtri fanti pù d’una volta a s fermav’n a s’ntir, squasi incantati, con le boche aperte. Adora lu i s fermav un moment, i s fev na risatina con cla boca sd’ntata e i dizev “fanti...mirat che a ‘nvi va drent i moscon!” Po’ i arpiav a pistar pu forta d prima. Far parlar Giuspin a n’er facile, p’rcos lu ier un tip che ai piazev stars’n p’r so cont, drent al so buchet, com al fa ‘l tupin drent al sach dla crusca, la zenta ‘ngnoranta, al dizev che ier un grusan, ma me a ni ho mai c’rdut, e a stev dle zornate a mirarl lavorar. Dai ozi, dai doman, a forza d vederm sempr li un bel di i m diss” O nin!...T ml spacherè un po’ d carbon che cussì iè trop gross?” A me a m parv d tocar ‘l ciel con un dit, e da cla volta lì a fu promos a “vicesotsquasiaspirantemagnan” ‘n prova, com i dizev lu. P’r me ader una vera e propria felicità, a fev andar ‘l sofion dla forgia zirand la manoveda, andev a la fontana a piar d’acqua p’r temprar, a spacav ‘l carbon, ‘nsoma a fev propri d nicò. Ma nonostante tut a armanev basit a vederl lavorar al foch, i piav le subie tute r’nversate che i portavn da le cave, i le metev a scaldar su un fochet che i parev fat con un fulminant, e po, quand ad’ern d’un bel ross com na ziresa, i le piav con le pinze, quatr colpi su l’incud’na, ed ech che ai arv’niv ‘l tai e la punta come nove. Dop i l’armetev a scaldar e po i le arpiav e i metev sol la punta drent d’acqua “ t ved caminar la tempra” i m dizev, prima d sbaterle tute drent al catin con sprici d’acqua bugita e un nuvlon d vapor.
Ma i momenti pù beli iern quand i cuminzav a arcontar le fole. Li i parlav l’italian, e quand i dizev le poesie al parev che i s strafigurass; le parole ai surtiv’n da la boca ciare e fresche com d’acqua che al sort dal bocalon, i oci i luzcav’n, e al parev infina pu alt. I m’arcontav d’omi trasformati in porzedi, d cavadi d legn pien d soldati, d zenta andata a l’Infern e su la Luna. D Giuspin i s sapev pogh e nient, ier capitat a Carara prima dla guera, e dop aver fat tuti i mestieri del mond i s’er mis a far ‘l magnan, sol al mond, i stev ‘n afit ‘nt’una caseta mez scalamata apena sot Fosla. Ma la so vita i la pasav drent al casutin ‘ndov i lavorav; anch su quanti ani i avess aier ‘l mistero, per tuti ier Zi Giuspin e bona. Un dì d’estata a passò a trovarl vers mez’dì, e lu i s’er a scaldar ‘l magnar a bagnomaria su la forgia, ‘nt’una gamela d’alumini tuta scornociata,” ninon” i m diss “fermt com me a magnar na bocata, mir che ozi aiè d bon!” E i scoperciò la gamala. Drent a i sirà stat si e no trenta gran d fasoli, con un toch d cotena. “ne Zi” ai diss me”chi a ni né asà neanche p’r un!” Lu i mi mirò seri, seri, e po i m diss:” arcordt, che i né a lo stomch che ‘n t dev mai far mancar ‘l magnar, ma a luchì” e i s tocò la testa “guai a non dar da magnar al zerved...Pov’r che d’om che ‘l fa murir da la fama!”
Me a nì capì nient, ma aier abituat ai discorsi un po strani d Giuspin e a fe finta d nient.
Dop un po d temp a cambiò ca, e a cuminzò a diradar le visite a Giuspin, fina che, un bel di, a ni son pu andat.
I ani i pasav’n, me a cr’sev, po ‘l matrimoni, i fioli, i  p’nseri aumentav’n e pian pianin i cancelav’n i arcordi.
Una volta, ‘l me niputin i vens ‘n ca mia a far ‘l dover, ier carich d libri com un mic, e i li posò sul tavulin, me a son curios, e a mi set arent, ‘n quel mar d libri aperti tut d’un trat a ved la fotografia d Zi Giuspin. Ier tut ‘n montura, con ‘n testa un caped quadr com na marmeta, sot aie scrit : Professor Giuseppe Sartori, insigne umanista e poeta, venne perseguitato per le sue idee liberali ...
’L rest dle parole al cuminzar’n a sbaluzicarm davanti ai oci, doventati lucidi, mentr un lagr’mon i cascò sul libr apert “nonno che fai? Piangi?”I m diss ‘l me niputin “ chi me?” Ai arspos “adè mei sì! Ie quel maladet raf’rdor del fen no!”Ma po, a m son r’ncios ‘nt’l cess p’r pianz’r ‘n pace.


Volpi Mario

Racconti di questa rubrica

Ti è piaciuta questa sezione, per lasciare un commento

File Audio del Racconto
CarraraOnline.com
CarraraOnline.com
Torna ai contenuti