La b’caza - carraraonline.com

Sezione a cura di Mario Volpi
Vai ai contenuti

La b’caza

Sol p'r noialtri
File Audio del Racconto

Spetta/le Redazione
Con questo racconto pongo fine alla serie che tratta argomenti di caccia. Purtroppo solo quelli della mia generazione, riconosceranno i luoghi e i nomi che un tempo erano delle vere e proprie istituzioni, come l'Armeria Bonanni, che si trovava di fianco al fotografo Michelino, ed era l'unica armeria di Carrara. L'estrema povertà imperante in quegli anni, faceva si che le cartucce venissero caricate artigianalmente dai cacciatori stessi, comprando solo quello che non si poteva fabbricare da soli, come i bossoli di cartone, che venivano riutilizzati fino a quando l'usura non ne impediva la ricarica.  La polvere, era ottenuta da residuati bellici, o da polvere da mina macinata, i pallini si ottenevano fondendo i rottami di tubature idrauliche, al tempo in piombo, il borraggio, da crusca di granoturco, e i cartoncini fustellando vecchie scatole da scarpe.

2 marzo 2013

Agù d B’rton, i n’er pù d prim pel, e i s n stev da lu com un can ‘nt’una caseta meza scalamata su, a meza costa, apena pasat ‘l cimitero d Fosla. La moia ader morta da tant d cl temp che lu i ‘ns’arcordav pù neanche com ader fata. Dop aver fat tuti i m’stieri del mond, mo a set’ant’ani sonati, i campav con chi quatr bagaron che i piav d p’nsion, ma lù ‘n s lam’ntav, p’rcos finalmente i potev dar sfogh a la pasion d tuta la so vita: la caza.
Na volta al mes, apena piat la p’nsion a le Poste, i ‘ndev a Carara dal Bonani, e meza i sla spolpav lì, in cartunzin, polvra, boz’li, e tuti chi altri catari che ai volev p’r caricar le cartuce. Po i arpiav ‘l tran, e content com na Pasqua, i s’nar’ndev ‘in cla caseta ‘n mez ai monti, da lu com un grusan, ma a lù ai piazev cussì. I s’er fat un capaned sot al fich, propri ‘n mez a d’ara, a d drent lì i tirav a tut quel che al capitav, merli, sguerle, beccafichi, p’rfina ai lucarin. Odio! Ad’er pù le volte che i spad’dav, che quele che i li piav, p’rcos i oci i n’er pu queli d’una volta, ma lu i s divirtiv lo stess.
Un di, mentr i er a futignar al pe d’un uliv, i vid arivar su un, a colp d’och i dovev es’r un bagaronar, p’rcos ier gras e lust com un chic d’ua, segn che i magnav ben tuti i di. Ier v’stit con na cazatora d v’dut marunzina, ‘n testa i avev un borsalino, con na piumeta ‘nt’el nastr, ‘n man i avev na dopieta a can ‘nterni, nova d zeca, che al bridav ancamò p’r d’oli che a d’avev su, ‘n vita na cartucera d peda piena d cartucion, con un ciapin, che i p’ndev, ancamò vot su la ciapa sinistra. A v’der com ier cunz Agù i s fè na risatina sot ai bafi, “nemanch i doves andar ‘a caza d leon” i barbotò tra se, e se, e po’ i s’armis a traficar.  I n siran pasati nemanch zinqui m’nuti che i s’ntì na trombonata propri dret a la ca, “i pizon ien andati” i p’nsò Agù  mentr i fev na corseta p’r andar a v’der. I rivò propri mentr ‘l forest i s’er chinat a arguiar qualcò d’ntera, e quand i s drizò...’N man i avev na b’caza? Si!..Propri na b’caza! Bela... Grasa e lustra, con ‘l bech lungh un palm, propri lì dret ca sua! Agù ‘n sla potev ber! Ma com! Lu i stev li d cà, e al v’niv un d fora a fari un dispet cussì? Al sirà stata l’nvidia, o la delusion, ma qualcò al scatò ‘nt’el zerved. I cuminzò a biast’mar com un turch, e po’ urland i diss” ne d’sgraziat, ma cos t’ha fat!..T’ma amazat la me b’caza?..Mo a m toch andar a Pisa a piarn un’altra p’r far ‘l can, a l’ho pagat diezi franchi e luchì ‘nt’un m’nut i m’là fata fora” E zù biasteme mise ‘n fila com ‘l rosari!
“Quel’uomo si calmi” i diss ‘l cazator imbarazat, con ‘l mus ross com un gadinazz “io non lo sapevo che la beccaccia era sua, comunque si calmi gli la pago, anzi le rendo anche la beccaccia morta, sa!.. Oggi è il mio primo giorno di caccia” ma Agù i n molav “ e me cos ai fai nasar ai can i to quind’z franchi e la b’caza morta? Fam ‘l piazer va via prima che a perd ‘l lum dai oci e  a fai a piet, va via e non t’arpresentar pù da ste parte!”
Po’ mentr ‘l forestier dop averi dat i bagaron con l’aument, e la b’caza, i piav a tronch azù p’ri pozi p’r far prima a cavars dai pe, i andò ‘n ca dand n sbaton a la porta. E li i cuminzò a sganasars da le risate, fina a quand ai cuminzò a v’nir i stangugion, e i lagr’mon ai oci. Con na man i t’niv la b’caza e con c’d’altr i carezav le piume, po i diss” Te t sen na regina, e nt potev finir tra le man d’un paiaz!”


Volpi Mario

Racconti di questa rubrica

Ti è piaciuta questa sezione, per lasciare un commento

File Audio del Racconto
Un lettore scrive
  • Marzio Casoli

Scelta del racconto:  La b’caza
Autorizzo:  la pubblicazione
Commenta:  La pfana al va' 'n cantina , a s vest da cuntadina , a s met 'l frabala' : la pfana a l'e' me ma. Se la befana e' la mamma , non potra' mai andare in pensione.

CarraraOnline.com
CarraraOnline.com
Torna ai contenuti