‘L toscano - carraraonline.com

Sezione a cura di Mario Volpi
Vai ai contenuti

‘L toscano

Sol p'r noialtri
Versione audio del racconto

Spetta/le Redazione

E' verso la fine degli anni ottanta, che nelle nostre zone si cominciano a vedere i primi cinghiali. Purtroppo, come sempre, quando l'uomo ci mette del suo, anche questa "introduzione" fatta in modo empirico e scellerato, ha portato a un vero e proprio flagello. Infatti i cinghiali introdotti  per la caccia, non sono autoctoni, che erano di piccola taglia e poco prolifici, questi sono "porcastri" ossia frutto di incroci in allevamenti improvvisati con scrofe comuni, con il risultato che oltre che di grossa mole, sono anche estremamente prolifici, e arrecano un grosso danno al nostro fragile ecosistema montano. Al di la di questo, anche se in modo romanzato, questa vicenda, con il suo personaggio protagonista, è realmente accaduta, durante una delle mie prime battute di caccia al cinghiale. Buon ascolto
E. De Fazio

10 febbraio 2013

Marcè ier nat a Gragnana, ma per un bel po’ d’ani ier stat a lavorar ‘n Maremma. Cazator sfegatat da sempr, i avev ‘mparat a cazar ‘l cinghial zud’là, dov ‘l fev’n da na vita. Cussì quand da le nostre parte a s cuminzò a veder i prim cinghiali, i p’nsò subt d met’r su na squadra tuta soa. I cuminzò con la muta di can: i comprò un segugio da un so amich ‘n Maremma, che i dovev far da maestr a chi altri, e po, provand e arprovand, i riuscì a meter ‘nsema altri sé can, tuti zov’ni com d’acqua, con nas, e voia d far, anch se un cinghial i l’avev’n mai vist. Po’ al tocò ai omi, i li scels con l stess sistema, scartand i blagon, o queli tondi com un rapin, e ala fin i armas’n na diezina. La squadra ader fata. Com a d’us a Carara, ognun i avev ’l sò ‘l sopranom, segon quel che ai piazev far a caza, cussì quel che i metev le post i dov’ntò ‘l Capuralin, quel che i scaciav i dov’ntò Borded, chi tre che i tirav’n mei, i s ciamav’n Ringo, Tuntun, e Pecosbil. Antò che anch ‘n’tla vita i fev ‘l maz’dar, i dov’ntò ‘l Boia, Robè che ier un fenomeno p’r v’der le trace i doventò ‘l Traper, Romano, Mimino, e l stess Marcè che i andev’n dret ai can i dov’ntarn i canai. Le prime cazate ader’n state un disastr. Tuti i s’arcordav’n le corse a rota d cod p’r z’ercar d taiar la via a un zinghial che i scapav fora da le poste, i urli per arciamar i can da mont a mont, le padede fate p’r le sciop’tat sbaiate, tirate o trop tardi, o trop prest, ma po..! Un dì, finalmente, un cinghial i avev lasat ‘l pel. I er un masch, i sirà p’sat un’otantina d chili, su la s’cena i avev dle set’le alt un palm, drite e dure, e nere com ‘l carbon. Dai lerfi i surtiv’n fora do denti arzirati al’insù lunghi tre diti taienti com falzin, ‘l pel ner com ‘l carbon ier squasi luzichent, ier propri na bela bestia. Quandr i entrar’n ‘n paes, a i mancav sol che la banda. La zenta ader tuta a la tonda, a veder cla bestia che i n’ave’v’n mai vist, atacata pri pe a un pal che do dla squadra, tronfi com piti, i portav’n su le spade. A la sera, ‘ntlà cantina dla Marì, cinghial a la brasa p’r tuti, e vin com se al piovess.... Ader ‘nbriach anch le scrane! Dop ‘l batesm del foch tut al filò liss com d’oli, e mo, la squadra d Marcè, a caza, al fev di veri mazedi.
Da un po d temp ‘n paes ad’er v’nut a star un tal che i lavorav a la Zona, i s’er trasferit da Grosseto, e i avev piat ‘n afit na caseta a do pian propri ‘nzim al paes. Sempr con la boca aperta, con cla parlata che i han zud’là, i dev la berta a tuti, e dop pogh temp, tuti ‘l ciamav’n ‘l toscano.
A la sera, i v’niv ‘n cantina, e a s’ntir lù, quand ier ‘n Africa, a lavorar con una Cunpania che al cavav ‘l petroli, ier cunsiderat da tuti com un castig d Dio, p’r mazedi che i fev a caza. A ni er un’animal che i n’avess amazat! Ma capins!...Tuta roba grosa!...Cativa!.. Com leon, ipopotami, bufali, perfin un elefante, nomica s’mate! A Marcè ier subt sfasolat pogh! “iè un blagon!” i avev sentenziat a Borded che squasi, squasi il volev ‘nvitar a caza. “Comunque me a cont p’r un, sent anch chi altri, e po a decideren”
‘N tant al banch, ‘l toscano, i cuntinuav a ufrir da ber anch al porch, e a arcontar le so storie, d sicur i sapev com fars benvoler! Un di però i fe un lavor che i fu un ver e propri colp da maestr; i portò a far v’der ‘n cantina ‘l sciop nov apena comprat. Ier un di primi Browing automatic a zinqui colpi, con ‘l casted sopra l’oturator, tut lavorat a smerli, la cana adè curta senza bindela, aposta p’r i cinghiali, con ‘n zim un mirin tint d ros, la cassa, d noz mased, adàv’ev chi novi calci che i ciamav’n “a pistola”, e ‘l gridet drent al puntized ier laminat d’or, ‘nsoma un ver e propri sciop da re!
A v las ‘nmazinar com a l’armas la zenta; tuti i volev’n provar a ‘nbrazarl, puntand contr la testa d cinghial ‘nbalsamata che ader atacata a la pareta, p’r farla curta con cla mossa li, e na meza damisana d vin, i rius’ a strapar un ‘nvit a caza con la squadra d Marcè p’r ‘l sab’t.
‘L sab’t dop,‘ntla nota, al vens la neva, ‘l zel i taiav ‘l mus, ma prima che al fus dì, tuta la squadra a s presentò puntuale com la morta, davanti a la cantina dla Marì. I stevn p’r andar via quand ech che arivò anch ‘l toscano. Ier com fasat drent na cazatora d v’dut verd, nova d trinca, con na cartuzera piena d cartucion a pada che quasi al segav ‘n do da quant ader streta, un caped con i paraoreci e na sciarpa maron a i nascondev’n squasi ‘l mus, le manine picle e ciciote, ader drent a un par d guanti d peda, a tracola i avev ‘l sciop a boca azù.
I partir’n ‘n silenzi, con i canai che i t’nivan i can al guinzagli, dop mez’ora i arivar’n propri ‘n zima al mont. La luna a zocav a nascundin tra le nuvle, mentr la neva al fev sumigiar ‘l bosch a una cartulina d Natal. Marcè i diss al Traper d dar un’ociat zu vers ‘l canal, se al cunv’niv fermars li o provar pu avanti. Dop diezi m’nut ‘l Traper i vens asù, i parev un camin p’r via del fuma che i fev da la boca, i avev ‘l pantafi, ma a s v’dev che i n stav pù ‘ntla peda.”Aiè pien d pè” i diss con un fil d voza a Marcè, “p’r me chi ainè una duzina, e ien ancamò fermi ‘nti bonacon sop’r al canal”.
Marcè i s zirò vers i om e i diss” da mo ‘n avanti a n voi pu s’ntir volar na mosca, andiav azù sot vent” e po rivolt a Capuralin “pensi te!”
“L Capuralin i diss “guai a fumar o a far d rumori, tuti dret a me,  caricat i sciopi sol quand sentiret la sciop’tata.” I omi ‘n fila indiana i sparir’n ‘ntel bosch, mentr i canai i cuminzar’n a amanir i can, metendi al cod un campaned per farli sentir a le post, che i n’ave’sn da scambiarli p’r zinghiali, po i si mis’n in fila p’r l lung distanti na trentina d metri l’un da c’d’altr ognun con un can o do al guinzagli, mo ier pronti.
‘Ntant ‘nt’el bosch ‘l Capuralin i cuntinuav a st’rm’nar i omi com Pollicino con le brise d pan, e quand i vid un bel pass i diss al Toscano”te con l’automatich sta chi, e non t’mpresionar se i dov’s’n passar” ‘l Toscano ‘l mirò ‘nt’el mus e po i ar’spos” o che!... Un saranno mica peggio che i bufali no? Va tranquillo che di qui un passino!”
Quand l’ultm om i fu a post i sparò un colp ‘n aria, ader ‘l segnale, i omi i caricar’n i sciopi, la batuta al cuminzav. I canai i sligar i can che i partir’n‘vers ‘l  bosch con ‘l nas ‘n tera. ‘Nt’un maz’ron a un zentinar d metri, il branch d cinghiali ier sdraiat p’r tera, un vizin a c’d’altr, i avev’n magnat i Licri e le radize ‘nt’el canal p’r tuta la nota, e mo i ern mez adurmiti a ridoss.  La fe’mna pù grosa al cuminzò a zirar la roteda del nas, e a rugnar, ad’avev s’ntit l’odor d d’om. A s tirò su, ma ‘l muviment i la tradì, ‘l so odor i arivò al nas di can, cussì ‘n t’un segond al partì la caniza. “Dai...dai” i urlò Marcè sparand un colp ‘n aria “vai...vai” i arspos Mimino sparand anch lu, e battend le man. ‘N t’un moment ‘l branch i fu ‘n pe, indecis su la direzion dov scapar, ma Romano d dret i urlò” auu...auuu  via via!” ‘L branch i zercò d taiar ‘l mont p’r travers, ma Borded che i avev ‘ntuit la mosa iaveva ‘nzà taiat la via, e i sparò do scio’ptate p’r aria urland” atenti ale poste!..Via via”.
P’r ‘l branch al fu trop! Drit com un fus i piò azù vers ‘l canalon e le poste, con i can al cul che i sbraiav’n com spazacamin. Al parev che un camion i avess dat la ribalta a un carich d badon ‘nt’el bosch, e che i andas’n a rutolon ‘ntel canal. I cinghiali i furar’n le mazere, i troncav’n i podon d castagn com fulminanti, i fev’n ‘l solch ‘nmez a le felze, ‘n t’un mulined d gambe e s’cene ,nere com ‘l carbon, con ‘l pel drit com scopete d stipa. I canai i seguiv’n la caniza asp’tand da un moment a d’altr la sciop’tata, squasi com na liberazion, ‘nveza nient, i can i pasar’n le poste e arpiar’n asù p’r ‘l mont da c’dal’altra parta. “Se ‘l Capuralin i ha lasat un buch a l’amaz” i diss Marcè seguend d corsa‘l solch del branch ‘n mez a le felze.
Arivati a le poste i cuminzast’n a sentir un odor....Po ìl vid’n. Abrazat a un castagn a un par d metri d’n tera aier ‘l toscano, con la cartuzera che al p’ndev p’r travers, l sciop nov butat ‘n tera in mez a le foie, e i calzon pien. Il castig d Dio, ‘l grand cazator, i s’ler fata adoss, e a s sentiv.! Marcè ‘l mirò, e po ridend i diss”na scena cussì al val ben un branch d cinghiali!”.                        

Volpi Mario

Racconti di questa rubrica

Ti è piaciuta questa sezione, per lasciare un commento

Versione audio del racconto
CarraraOnline.com
CarraraOnline.com
Torna ai contenuti