L complean - carraraonline.com

Sezione a cura di Mario Volpi
Vai ai contenuti

L complean

Sol p'r noialtri
File Audio del Racconto
Spetta/le Redazione
Per spiegare bene il concetto che voglio esporre occorre fare un piccolo gioco di parole.
Tutti i genitori desiderano ardentemente dare il meglio alla loro prole, o meglio, dare quello che loro ritengono sia il meglio, e questo in tutti i campi da quello economico a quello sentimentale. A tal proposito fino a pochi decenni fa i matrimoni "combinati" erano la prassi, privilegiando la posizione sociale dello sposo o della sposa  a quella ritenuta secondaria, della felicità del futuro sposo o sposa.
Anche il futuro mestiere del figlio o della figlia era deciso alla nascita, spesso la continuazione di quello svolto dal padre. Così per secoli abbiamo avuto dottori che odiavano la medicina, o panettieri che desideravano ardentemente essere dottori.
26 maggio 2013
D’om ier ‘n pè davanti a la finè. La stanza, squasi a d’ultm pian d’un palazon antic, ader granda e aredata con sfarz, i muri ier’n  pien d quadri, con le curnize masize, dorate e piene d smerli, tut a la tonda del sufit alt sempr, un’altra curniza sempr dorata, a s spicodav ‘n’tel vot, e al contornav di anzoleti che i sonav’n un t’un zel zelest senza nuvle.
Ad’er squasi nota, da chi ‘nzim a s dominav la cità d sot. I palazi con le finè iluminate, i pare’vn le casete del Presepi che a s fa a Natal, tacati un a ch’d’altr, a perdita d’oc. Na via, drita com na sab’lat, a li dividev ‘n dò e i lumi dle machine i li colorav’n d ross da na parta, e d bianch da ch’d’altra. Lazù a la lunta, di nuvl’on i n prom’t’vn nient d bon, ogni tant al scricav un lamp che per un s’gond i fev veder l’orizont, per po’ arciod’r nicò dret a un drap ner.
I rumori  chi i rivav’n smorzati, com se i pasas’n atravers un sach d bambaza,  tut piat da i sò p’nseri d’om i ni fev nemanch cas. Ier un bel’om alt e ben piazat, anche se a s vedev che i n’er pù d prim pel. Nà gran testa d capedi  bianchi, squasi arz’ntati,  i sendev’n lunghi fina al cod,  su la fronta i fev’n  un zuf ben petinat, che i parev squasi un’onda. A si arconosev la man d’un barbier di chi bon, com a s conosev la man d’un gran sart ‘n t’el v’stit che i avev ‘ndoss;  scur, taiat a p’ned, con nà camisa bianca com la neva, con i boton neri, ‘l bav’r  ier cios da un “papillon” d seta nera, i pulsin che i spunta’v’n fora dle maniche dla giacheta i ern tenuti abotonati da un par d gemeli d’or.
Ozi i cumpiv sesant’ani e la sò vita a i pasav davanti a i oci com un film….
Ier nat a Carrara, unich fiol d’un tranvier e d’una lavandara, i stev’n in afit, let e foch, ‘n t’una caseta propi ‘n piazeta, e fina a diezi, ond’z’ani,  ier stat com un Papa. I s’arcordav le corse con i so amicheti tra i banchi del mercat a robar le fiorone a la Marì, le guere con queli d Grazan p’rcos i n volev’n farli andar a zocar ‘nt’el fium, le corse in via Santa Maria con i ruz’lon d marm p’r sviar la zenta dai pisulin d’estata, ‘nsoma tuti chi lavori che i piaz’n tant ai fanti, e che i fan ‘ntisghir i grandi, ma po’ apena f’nit le elementari iern cuminzat i dolori.
So pà, pov’om senz’altr a fin d ben, i ser mis ‘n testa d farl studiar da ragionier p’rcos i dizev “ che un ragionier i n va a tute le ore a guidar ‘l tram”. Ma lù da cl’orec li i ni s’ntiv, i volev cultivar la pasion dla sò vita, ma sò pà i dizev che i avev la testa piena d grupi, e che fina a quand lu i fus stat viv, i avrè studiat da ragionier e basta. E cussì ader cuminzat la Via Crucis.
So mà, che Dio i l’abi ‘n gloria! Al zercav ‘n tuti i modi di acontertar tuti e dò senza scuntradir nisun ma a n’er facile! Per squasi do ani ader riusita ( e Dio sol i sà con quanti sacrifizi ) a mandarl a scola a la matina e dop mez’dì, i potev ‘ndar a cultivar la sò pasion. Ma un brut di sò pà i s’ner acort! I tafon i volav’n dap’rtut e qualc’d’un a si er b’cati anch sò mà, dai urli a s’er r’stret tuta la piazeta, lu ier riusit a scapar azù ver Piaza Alberica mentr i vizin i tratniv’n sò pà che i parev paz. E lù adora i decis d’and’ars’n via d’n cà.
I primi tempi ier stati duri, i avev duvut zercars un lavor p’er poter magnar, e ier andat a star p’r un po’ ‘n cà d’un so amich a La Spezia, che i avev la sò stessa pasion, po’ i avev cuminzat a zirar l’Italia ‘n lungh e ‘n largh,  fina quad dop squasi sé ani i sep che sò mà a le stev mal.
Un tron che i parev nà mina i fè dari un t’rmon arportand’l a la realtà. Oramai ader bui pist e lù i azes un lum posat su un tavulinet li arent, da un’armadiet tut ‘ntarsiat i piò un bicier e i s versò un goz d liquor,  dop un par d sorsi i s’armis a mirar fora dla finè, d’acqua al v’niv  zù a catinede  al pistav contr a i vetri com se i la tiras’n coi seci, le saete al disegnav’n dle strise d foch che al durav’n un s’gond prima che un tron i spacas i tampani e i fes tr’mar i vetri, ma tut quel mazamuded a lu i ni ‘nteresav, i posò ‘l bicer ormai vot e i s’arbutò ‘nti so p’nseri. Ier arivat a cà a rota d cod….Ma ier rivat tardi. Sul let con le man ‘ncrozate sul pet sò mà al parev ancamò pù picina. Com lu ier entrat ‘n’tlà stanza sò pà i er ns’it, cussì senza diri nà parola, come se ‘nveza d se ani al fus’n pasati dò m’nuti, da l’ult’ma volta che i s’ern visti. Mentr i lag’rmon i lavav’n ‘l mus, i basò so mà su la fronta, col p’nser i diss” ciao mà “ po’ i arsurtì ‘n silenzi passand davanti a sò pà che i n’l mirò nemanch. I dovet tribolar anch’amò un po’ d’ani prima d tirar ‘l fiat, ‘n’t’el fratemp anch sò pà i s cavò da pagar d’est’m, e lù il fè sot’rar a Marcognan vizin a so mà. Qualch’d’un i bussò a la porta e i diss” due minuti” Lù i arspos con un mugugn, po’ i s det na sistemata a i pulsin dla camisa “che bel complean” i p’nsò “ da me com un can !” I surtì fora da la porta e i passò da dop na  tenda. L’aplaus pogh al mancò che i fes v’nir zù ‘l teatr, i profesori dl’orchestra i s’alzar’n ‘n pè batend le man lu i s’nchinò, i montò sul podi  i piò la bacheta ‘n man. D colp al calò ‘l silenzi, mò ‘l concert i potev ‘ncuminzar.
Volpi Mario
Racconti di questa rubrica

Ti è piaciuta questa sezione, per lasciare un commento

File Audio del Racconto
CarraraOnline.com
CarraraOnline.com
Torna ai contenuti