Guerra tra fanti - carraraonline.com

Sezione a cura di Mario Volpi
Vai ai contenuti

Guerra tra fanti

Sol p'r noialtri
Versione audio del racconto

Spetta/le Redazione
A metà degli anni cinquanta, l'Italia, ferita dalla guerra, annaspava ancora nella miseria più nera, solo di una cosa vi era grande abbondanza; i bambini. In un mondo dove le case erano spesso"let e foch" (letto e fuoco in un solo ambiente), e i fratelli erano numerosissimi, era normale che i nostri giochi si svolgessero sempre all'aperto. Anche i giocattoli erano un articolo sconosciuto e noi ci si industriava a fabbricarceli  da soli, con i materiali di scarto, come le camere d'aria delle biciclette, con cui si ricavavano gli elastici per le fionde, o gli ombrelli rotti, le cui stecche era ricercatissime per costruire gli archi. Anche i campi e i boschi dove questi giochi avvenivano erano gelosamente custoditi dai bambini residenti, disposti a difenderli anche con una "guera tra fanti" (guerra tra ragazzi).
E. De Fazio 28 dic 2012

P’r noialtri nati e cr’suti a Montverd, la Costaza ader ‘l nostr regn. Da semp’r.
Cussì, quand queli dlè cà popolari dlà Ragia i t’ntar’n d portarsla via, al fù la guera. Dal prinzipi al bastò qualch pinton, e un par d gambete, p’r fari capir chi al comandav, ma po’, sicome noialtri eravan sol che ‘n diezi ,e lor ’n’t’ una sbarica, a s tocò organizars.
Apena sop’r la ferovia dla Marmifra. a ier un slamon, ‘l viol che i portav ai Palazeti i partiv propri d li, tut curve com un biss, e noialtri propri ‘n zim a decidest’n d fari un furtin.
Armati d picon e d pale, robati d nascost ai nostri pà, ‘n manch  dì tre di, ‘a fest’n ‘l lavor. E che lavor! ‘L poz che avevan scelt ier stat tut spianat, po’, propri ‘ntl’mez, ai avev’n fat nà buca, con la tera che a tirav’v fora a fest’n com un muret tut a la tonda, do brochi piantati ‘nzir i nascondev’n nicò.
Che i v’nis’n mò a far i padron! ‘L nostr cap ier Gianni che i avev ‘nzà tred’z’ani, me con dodz aier ‘l sot cap, e po’, zù, zù, fina a rivar a Lucio che a sé ani ier la sentineda.
‘L cap di ragesi i s ciamav Paolo, ma noialtri al ciamav’n Cotena, p’rcos i portav i capedi cussì curti che a si v’dev ‘l rosa dlà cotena.
Le prime guere a n’ern state bele! P’rcos na volta la mancav un…n’altra volta c’d’altr, e cussì, d’acord col Cotena, a decidest’n che prima d far la guera a s dovev stabilir ‘l dì e d’ora.
Chi al vinzev, oltre a poter andar  a sù p’r la Costaza p’r nidi, o a magnar le more, i avrè putut portar via la bandiera a c’d’altr, che cussì i sirè mort da la vr’gogna. La nostra ader la fin del mond!
Tuta bianca, ad’avev propri ‘ntel mez un mont verd, disegnat con i acquredi, ‘l Cotena i avrè dat un braz p’r poterla piar, ma fina a mò i ni er anch riusit.
Le nostre sfionde al tirav’n luntan, e lor dal bas ins’vedev’n nemanch, figurarsi a piars! E po’ noialtri, a la malparata a tirav’n le “bombe.” Ad’ern  di groton che a solezev’n un a un, i dovev’n eser tondi e non trop pesi, p’rcos quand a li butav’n a rutla i dovev’n  rivar fin ‘n fond. D solit le guere al f’niv’n al prim neron, o a la prima testa rota, lor i scapav’n, e noialtri a li snomav’n p’r un po’, urland da la contenteza d’aver vint.
Un brut dì però, al Cotena a i vens un’idea; i zercò l’aiut d queli d Sant’Antoni, e p’rfina d qualc’d’un d Pu’nzimat, po’ quand i fù sicur del fat so i diss “pod’oman a fian la guera…A la trea la vostra bandiera al sirà mia”.
Noialtri ‘l dì dop a s d’est’n da far p’r preparar le bombe, i groton per le sfionde, e tut ‘l rest, qualc’d’un i p’nsò anch d preparar nà butigia d’acqua, casomai, esend d’agost, ‘n s pias’n p’r seta!
Ma ‘l Diav’l i fa le pignate e non i coperci! ‘Ntlà nota a Gianni a i vens un f’bron da cavad, Marcè e Brunè, che i ern fratedi, i dovest’n andar con so pà a s’gar ‘l fen, e cussì ‘n quatr, e quatr’ot, metà banda al vens a mancar; mo la facenda al bugiv dalvera!
Oramai ader trop tardi p’r tirars ‘ndret, a la doa dop’mez’dì a sian ‘nzà al pez, me p’r l’ocasion a son ‘l cap, ‘n pè drent al furtin a mir i “omi” che a m’è armas, e a zerc d non fari capir che stavolta al sirà dura dif’nd’r la bandiera che abian a le spade.
A la tre ‘n punt, puntuali com la morta, ecli che i veg’n.
Quand i s ragrup’n p’r far pasar ‘l tram, i fan squasi paura!
I saran pù d trenta, i veg’n avanti cantand, tenind alta su na cana la bandiera, con a la testa ‘l Cotena; apena rivati a la ferovia, una diezina di pù arditi i part’n a l’atach ‘nbrancati com pecre, me aspet che i abi’n fat nà trentina d metri d salita, po’ a di “bombe!”
I groton i pist’n zù, troncand stipe, furand maz’ron, e r’nbalzand p’r aria com pade da canon.
Adè trop anch p’r i pù corazosi che i scap’n aret a rota d cod; noialtri a urlan da la gioia e a i tiran i moteti p’r s’nomarli.
Ma ‘l Cotena i n mol! A ved che i s sbraz p’r insignar ai so dov pasar, po’, dop averli fati met’r tuti ‘n fila p’r ‘l lung, i li fa partir a l’assalt, urland com spazacamin.
Noialtri a mete’n man a le sfionde, “tirat al Cotena! “ a diz me!
Ma ‘l viglich i ha magnat la foia, e i s n’stà ben r’dopiat dret al muret del pont dla ferovia. Qualch fiondata al cuminz a pistar un po’ trop vizin e me a p’ens che al sirè mei bat’rs’la, a stai p’r dar l’ordine quand ‘l destino i decis d dars nà man.
Bufand vapor e fum com un dragh, al pass ‘l treno. I và asù, vers la Stazion d San Martin, ma iè lungh com la Quaresma e i fatig, tant che a s ved ben ‘l machinista ‘mpalar carbon, mentr ‘l fochista i sfrugon la caldaia p’r far pù fiama.
Iè un moment! Na scintida al sort dal camin, e ‘nt’un s’gond tut l slamon i pì foch.
“Orti, orti” a urlan noialtri sende’nd zù a rota d cod “smorzan ‘l foch prima che al brus nicò”. P’r mezora a lotan ‘nsema contr ‘l foch, l’amich con ‘l nemich, pistando su le brase con di frascon d morteda, con ‘l fum che i lev ‘l r’spir, e i fa lagr’mar i oci, ma a la fin a i la fian, ‘l foch iè smorzat.
Urland d gioia a s’abrazzan com fratedi, p’r cas a capit vizin al Cotena, che i m bat nà man su nà spada e i m fa “p’r un pel a né brusat nicò, p’r furtuna che eravan chi anch noialtri!” Po’ mirand la bandiera che al svent’l ‘nzim al furtin i di “ lun’dì a vegn a piarla” me al mir…..E a mus dur a r’spond “ a che ora?”


Volpi Mario

Racconti di questa rubrica

Ti è piaciuta questa sezione, per lasciare un commento

Versione audio del racconto
CarraraOnline.com
CarraraOnline.com
Torna ai contenuti