L padrunzin - carraraonline.com

Sezione a cura di Mario Volpi
Vai ai contenuti

L padrunzin

Sol p'r noialtri
File Audio del Racconto
Spetta/le Redazione
Il trasporto del marmo verso il piano, è rimasto pressochè invariato per secoli, ma a partire da metà del 1800, ha avuto una accelerazione impressionante, da prima con la Marmifera, e poi con i camion. Il dopoguerra, con i suoi numerosi residuati bellici, ha favorito il definitivo abbandono della lizzatura, attiva fino agli anni cinquanta, e la costruzione delle vie così dette di "arroccamento" ossia che arrivavano fino al piazzale delle cave. Oggi l'industria usa le nostre cave per testare autocarri sempre più potenti e affidabili, ma quando vengono a collaudarli chiedono espressamente autisti carrarini, chissà perché?
6 Aprile 2013
Adè anch nota quand a sort d’ncà, e un’arieta cruda a m fa stremulir. Mentr a m’r’nfagot mei drent al matalò, a mir ‘nsù, dov un zel ner sbaluzicant d stede, i promet nà bela zornata.
Ferm, ‘ndov a l’ho lasat ieri “Dino” i m’aspet. La brina posata su ‘ntlà gabina al luzc apena, al lum d’un lampion li arent; ben piantati su i so quatrasi, i par un mostr adurmit.
A mont sù, e a met la ciaveta ‘ntel quadr che i s’azend com un’albr d Natal, aspet un moment p’r dar ‘l temp al computer d controlar nicò, po’ a la zir. Con nà fumata il motor i cuminz a ronfar com un gat viziat arent al camin, atach d’aria calda p’r far sbrinar i vetri, e po’ a send a pulir i fanali con un straz. Iè propi bel ‘l mè “Dino”, nient a che v’der con ‘l “Waith”che i avev mè pà bon’an’ma. A ml’ arcord com al fus ieri! A ier un bardason d tred’z’ani, quand setat arent a lù, andev’n  p’r  badon ‘nti ravaneti. E che vita col motor! Ogni po’, po’ ier ‘n tochi, e mè pà, cunz com Sain, con la morca fin sot ai oci i smocolav com un turch, zercand d’acomodarl; ma i ricambi ‘n si trovav’n, e quand i s trovav’n i gostav’n l’ira d’Dio. I ult’mi tempi i stev ‘nsema col fil d fer. Piturat a p’ned con ‘l’ verd p’r le p’rsiane, con ‘l nom “Dino” com mè pà, scrit ‘n bianch sul mus, a Carara ‘l conosev’n tuti, ier doventat squasi un’istituzion. Ier stat d’ultm camio american a andar a l’ sfasin. Me p’r soldat avev piat la patente p’ri camion,  e apena arv’nut a cà a ier andat a lavorar sot padron, ma con ‘nt’l zerved l’idea fissa: d rivar a comprarm un camio tut mi. E mò dop squasi diz’ani d vita tribolata, a dl’avev fata. A m son licenziat, e con chi quatr bagaron dla liquidazion, ho dat l’anticip, po’ firmand do chili d cambiali a iò comprat “Dino”. Si, p’rcos anch al me camio aiò mis ‘l nom d me pà.
I è un quatrassi turbo, con tuti i so lavori p’r ben, compres ‘l barachin e d’aria condizionata, p’rcos del cald, e del fred, a nò patit asà, ogni prim del mes a ma’ riv la stangata dla rata,  p’r pagarla a dev lavorar al dopi d prima, ma almanch a lavor p’r qualcò!
S’taman a dev andar ‘nt’una caveta nova, propi sopr Loran, adè la pù alta d tute, e a nì vò andar nisun p’rcos la via adè tribolosa, ma mè a n pos far trop ‘l sufistich, e un client ‘n pù i fa sempr comd. Dop un cafè da la Marì, a pì asù p’r l canal d Ravazon, ‘l motor i cant ‘n surdina, d’aria cundizionata al fa ‘l so dover, e a me a m par d’esr ‘n Paradis.
Ma prest a m svei. Dop i primi tornanti la via al dovent pogh pù che na mulatiera, drita squasi a piomb, streta, piena d buche che a d’ariv’n a meza rota, ‘l giaz i fa ‘l rest. A tir sù l pont, a met la ridota, e a cuminz a arancar;’l turbo i url la so disperazion, ‘l motor i va su d ziri, mentr le rote al boch’n la via com un can i fa con d’oss .D dret a m las un polv’ron che i s po’ taiar col colted, drent a la gabina a son sot’acqua, e a né p’r ‘l cald,  mentr a son sbatut com un’ov strapazat. Basta; a forza d marcia avanti, e marcia aret, ariv ‘nzim, a send, e sudat com a son, d’aria z’lata a m cioch na rasoiata sul mus, po’ a m met do diti d giaz lungh ‘l filon dla s’cena. La “vecia” al bad atorn al tub d scapament, com se al fus agost, e me a las ‘n moto p’r far rafr’dar un po’ d’acqua. ‘L cap’cava, tut ‘nbacucat e sporch d fangh, i m fa v’der ‘l pez che a dev portar azù, a i capedi i m s driz’n ‘n testa.
Iè un” ’nform” gros com ‘l monolite, a oc e croza i sirà pù d quaranta tonelate. A tent d cunvinz’rl a scap’zarl un po’, ma a ni è nient da far, o ber o afogar. Pazienza oramai a son chi! ‘L camio iè nov, e a me do bagaron ‘n pù i m fan scomd dal vera. A vegn ‘ndret e a m met a la via, a m fai dar d man da un par d’omi, e a tir zù dal cason le verghe, e dop aver calz le rote, a ligh ‘l mostr con la braga e  a cuminz a tirar col vinz.
Da prima i n fà na piega squasi  i fus murat ‘n tera, ma po’ pian pian i cuminz a mov’rs, man, a man, che i mont, le balestre a s lamen’t’n com un frat a l’elemo’sna. Mentr ‘l mostr i sguil su le verghe, la cabina a s’alz, com se “Dino” i voless rampicars ‘n ciel p’r scapar da sot quel groton che me ai carich su la s’cena. A la fin ‘l bloc ie in zim a i parati d fazz del casson, a dai na braga e a tir col vinc, mo ie sicur.
A la prima marcia ‘ndret  a m’acorz che ‘l bloch i è talmemte gros, che da li speceti a n ved squasi nient, e a m toch spicodarm dal f’nestrin p’r veder qualcò, quand po’, la rota davanti al smov un groton che i part  rotoland, p’r pistar ‘n fond al ravanet trezent metri pù ‘n bas, a m sent v’nir i sudori m’nuti. P’r arivar ‘n fond a i met na vita, e quand a son ‘ntla via bona a son sfat com un gualch, e anch con ‘l servosterz a m sent pù i brazi. Quand a pas a Toran, una coriera d giaponesi a m scat un vagon d fotografie, a m ferm a la prima cantina, p’r farm un gozet....A nò propi bisog!
A sian squasi a mezdì, d’aria adè pù dolza, e me a ciod l’aria cundizionata, ‘l barachin i cuminz a bisotar....Iè  Antò che i m ciam dal versant d Fantiscritti p’r salutarm, pogh dop a sent Virgì che i avert tuti che vers Nazan “al piov forta”, me a rid sot i bafi p’rcos al vò dir che aie la Pulizia, a mi mancherè anch un verbale.
A cambi via e quand ariv ‘n segheria adè squasi un’ora; chisà se a fai a temp a far un’altr viaz.
Volpi Mario
Racconti di questa rubrica

Ti è piaciuta questa sezione, per lasciare un commento

File Audio del Racconto
CarraraOnline.com
CarraraOnline.com
Torna ai contenuti