L’uzed d Natal - carraraonline.com

Sezione a cura di Mario Volpi
Vai ai contenuti

L’uzed d Natal

Sol p'r noialtri
Versione audio del racconto

Spetta/le Redazione
Per più di trenta anni sono stato un accanito seguace di S.Uberto, poi non mi sono più sentito di praticare questo sport, così da altrettanto tempo ho appeso la doppietta al chiodo, pur senza condannare chi ha deciso di continuare in questa attività. Ed è proprio di questa mia militanza che voglio raccontare, o meglio di fatti, storie, e leggende che in tanti anni di caccia ho sentito raccontare dai cacciatori più anziani, magari in un gelido passo montano, o in una ventosa mattina nella pianura maremmana. Non nascondo che molti spunti sono tratti da fatti veri accaduti proprio a me. Spero che questa piccola serie di "racconti di caccia" che voglio pubblicare, piaccia ai nostri visitatori, premettendo che nessuno dei racconti che posterò conterrà materiale che potrebbe urtare la sensibilità di qualcuno.

E. De Fazio
24 gennaio 2013

I cazatori veci i l’avev’n semp’r arcontata, e st’an Cleò ‘ ser mis ‘n menta d provar, p’r veder se ader vrità, opur se ader na fola. I dizev’n che a amazar un uzed la matina d Natal, prima che ‘l sol i s fuss levat, quest i ni sirè marzit p’r tut d’an, com se i fuss stat ‘nbalsamat.
I sapev ben che i cazatori novedi com ier lu, i v’niv’n spess coionati da chi veci, ma questa a ni parev una dle solite bale, e po, ala mal parata, i avrè pers solament un po d son. ‘Nzà un bel po prima d Natal, Cleò i cuminzò a lampicars ‘l zerved p’r p’nsar che uzed ai sirè piazut tenir p’r tut d’an. Po a i vens ‘n menta, che vers i Bozi dla Fornaza, i dizev’n che ai fev di uzedi che i li ciamav’n Uzed d San Martin; lu i l’avev mai vist, e i n sapev neanche com iern fati, ma con un po’ d furtuna a n dovrè esr stat dificile aciaparn un!
Dita e fata la matina dopo i aguantò la bicicleta, e azù che al ven Cason, quand i s trovò ai bozi i s mirò un po a la tonda p’r studiar la situazion. I bozi i n’ern altri che di buchi che ad’avev fat la Fornaza p’r piar la tera p’r far i maton, pian pianin, con ‘l temp e d’acqua piovana, i s’ern empiti, e mo i parev’n di lagheti, con tant d canede e p’sseti che qualc’d’un i avev butat drent p’r divertirs a p’scar. Cleò i decis d far un capaned  propri sot la sponda del boz. Dop un’oreta d lavor i s mis a mirar ‘l so cap’lavor; pu che un capaned ier un buchet, che p’r entrari drent, al tocav far i zochi com queli del circo Togni, ma da do passi an s vedev nient. La sera dla Vizilia ala ond’z i diss bona a tuti, “ma com!” Al diss so mà “’n t sta con noialtri a sp’tar la mezanota? Adè la nota d Natal!” “No...Doman a dev star su prest p’rcos a vai a caza” i respos Cleò” bona a tuti... e auguri!”
I mis la sveglia a la zinqui, da la paura d non far a temp a veder ‘l sol levars, i preparò l scip e le cartuze, e po via sot i linzoli, che iern stechiti com na lastra d marm. I durmì pogh e mal cla nota lì, i s sentiv un qualcò adoss che i n’l fev posar, e quand i s’adurmì com un putin...La svei al sonò! Ader ora. I s’alzò d malagrazia, e i mis un goz d cafè a scaldar sul forned, i s det na saquata al mus con do dit com i fan gati, da quant che d’acqua del bazil ader zelata, po i nesì.
Ader na notata da cartolina. La luna ader piena e ader ciar com se al fuss mez’dì, ‘nt’l zel, ner com un frin, le stede al parev che al stremulis’n anch lor dal fred. La via e i campi iern bianchi d brina z’lata, che al ciaror dla luna i luz’cav’n com na lastra d’arzent. Cleò i de un tremon, i s’nsacò pu chu i potè drent al matalò, e dop esr’s calcat ‘n testa squasi fina ai oci ‘l caped d lana, i cuminzò a pedalar, stand atenti a non sguidar su la via z’lata. Quand i rivò ai bozi ier mored dal fred, e ai v’ns la voia d’arzirars, ma po’ i s diss tra lu, e lu, “ oramai ai son e ai stai!”
Com Dio i vols dop un bel po’ al cuminzò a far dì, e Cleò, dop aver caricat l sciop, i s r’mpiatò drent al buchet che i avev preparat. ‘L zel i bocav com un can arabiat, ‘l nas, e i oreci, i sli sentiv neanche pù, e a tocarsli i avev paura che i saren andati ‘n brise com un bicer cascat ‘n tera. Quand i cuminzò a vederi mei, i s’acors che anch ‘l boz ier z’lat squasi tut, sol ‘nt’l mez d’acqua a s movev anc’amò, increspata dala brezeta zelata; i brochi di arbri pu arent a d’acqua ier chinati sot al pes d mili candeli d giaz, e i dev’n l’impression che i s saren troncati da un moment a c’d’altr. Su le sponde del boz ‘l paler ier drit e dur com se ‘nveza d’erba i fus fat d fil d fer,  la tera al parev d  ziment, an s sentiv nient, com se anch i rumori i fus’n armas z’lati ‘nt’d’aria.
Tut d’un trat i vid com na pada zelesta tufars ‘nt’l laghet, e dop un segond arv’nir su, p’r posar su un broch li arent. “Ai sian” i p’nsò Cleò, e i fe p’r tirar su l sciop, ma i ni riuscì; a forza d star agavugiat drent a quel buchet a i s’er adurmit ‘l braz, che mo i ni parev  pu neamanch ‘l so.
‘Ntant l’uzed sul broch i sbataciav ‘l pesset che i avev ‘nt’el bech, e dop aver zirat la testa p’r mirars a la tonda, ‘l butò p’r aria p’r arpiarl al vol, e con do scodon i l’ngodò, po i s mis a sfregar ‘l bech sul broch dov ier posat, propri com i farè un ninin p’r pulirs la boca dop aver magnat un toch d fugazina. A forza d sfregar, ‘l braz d Cleò i cuminzò a respondr, e lu i puntò l sciop, ma propri ‘n quel moment un spric d sol i pistò su l’uzed.
Al fù com se un’arcobalen i fus andat ‘n tochi! Tuti i colori del mond iern lì, apizicati a le piume d cl’uzed, e i cambiav’n a segond d  com i s zirav. Cleò i armas drit e dur com un stocafiss, con la boca aperta, e i oci spalancati, i s sentì un qualcò drent, propri a la boca dl’stom’ch che i n’avev mai ‘ntes, al fu com se i avev ‘ngodat mili farfade, e che mo al volas’n tute ‘nsema. ‘L dit sul gridet i s molò...No!..Ans potev tirar a un’arcobalen! E po’ ‘l so ier ‘nzà nat!
I arguaiò nicò e i arpiò la via d cà, ma ancamò dop tanti ani ‘l dubi i me armas, al siran fole, o al sirà vrità?

Volpi Mario

Racconti di questa rubrica

Ti è piaciuta questa sezione, per lasciare un commento

Versione audio del racconto
CarraraOnline.com
CarraraOnline.com
Torna ai contenuti