L filista - carraraonline.com

Sezione a cura di Mario Volpi
Vai ai contenuti

L filista

Sol p'r noialtri
Versione audio del racconto

Spetta/le Redazione
In occasione delle festività Natalizie non potevo non mandare un racconto che non fosse ambientato in questo periodo. Prima dell'invenzione della catena diamantata, il filista era il mestiere meglio pagato delle cave, ma non per generosità, ma solo perchè veniva svolto in turni 24ore su 24, nelle torride giornate estive come nelle gelide o piovose notti invernali, spesso in posizioni pericolose, con il rischio di cadute o di frane. Furono molti gli infortuni spesso mortali di questi lavoratori, ed è per questo che vorrei dedicare questo audio-racconto a quelli che nelle nostre cave, per un pezzo di pane hanno perso la vita. Buon ascolto

‘L cap’cava i avev parlat ciar ‘ntl’a matinata. I avev ciamat tuti i filisti ‘n mez al piazal e i avev dit” beli me fanti, alsò anc’amè che doman adè Natal, ma purtrop qualc’d’un stanota i s dev f’rmar a far la notata, fra tre dì al ven ‘l barch, e st’ pez chì i dev’es’r caricat p’r forza, p’rcos altrimenti aiè cas che al salt anch la quindizina. F’rmar a n poten p’rcos col fred che al fà a r’schian d’nciodar nicò, e p’r arpartir dop, ha i vò la man d Crist. A quel che i s ferm ai dai ‘l cotm….Dodz’ore e f’nit, librefesta!…’N pù diezi franchi d premi.”
“A vegn mè” i diss Antò ‘l pù fant d tuti, ‘l cap ‘l mirò un po’, e po’ i diss:” ne Antò, propri tè che t’ha ‘nzà dat i ot dì?” “ Propri p’r quel che a m ferm… do bagaron ‘n pù ‘n m fan scom’d dal ver!”
Vers la zinqui ier ‘ndat a magnar na bocata d pan da l’Ernè, la capanara, e mò ier lì, mez mort dal fred, a star atenti che acqua e rena a n v’nis’r a mancar.
Bruta vita ‘l cavator!….Ai arv’niv ‘n menta quand lù ier anca’mò un fant, e so pà i avev ‘nzà spes na vita su p’r chi monti, fina a quand, un brut dì, i d’avev’n arportat a cà drent a un  sach, a tochi com la tunina, tant che a lù i d’avev’n nemanch fat v’der.
Po’ ader tocat a lù montar ‘l mont!…Prima come bagasch, e po’ pian, pian, su, su fina a dov’ntar filista d prima. Ma drent d lù aier semp’r stat un’unich desideri, farla f’nita con clà vita lì…Partir…And’rs’n p’r ‘l mond!….A n’mportav dov……Tuti i posti iern bòn, basta star a la lunta da chi monti assassin!
E d morti i n’avev vist di chi po’!….Quanti mugnon i avev ‘ntes!….Quante corse a rota d cod zù p’ri ravaneti, magari p’r arivar a temp sol p’r ciod’r i oci a qualch d’sgraziat!
Ma mò basta!
Se Dio i vò ader f’nita, i avev r’sparmiat anch sul magnar p’r tanti ani p’r poters comprar ‘l biget, ma mò i d’avev ‘n sacoza. Tra diezi dì i sirè partit da Genova!…..Destinazion America!
Zert!  Il sapev anch’lù che i primi tempi i sires’t stati tribolati, ma ier zov’n come d’acqua!….E po’ i n’er nomica sem!…I avre saput sgavugiars. ‘N’tant però, mò ier lì, ar’ndopiat dret a un bloch, tut agavugiat drent al matalò lis e st’rminzit, arent a un fochet che al parev che i aves fred anch’lù da com i s’tremuliv. Tut a la tonda ‘l fred i la fev da padron, da lassù, ‘n zima a la tecia dov ‘l marm i s s’picodav ‘n’t’el vot, di candeli grosi com parati i sbaluzica’v’n al lum dla luna, mentr la brina al cupriv nicò sot un linzol d’arzent.
‘L zel, ner com l’nciostr, ier tut un fiurir d ‘strede, mentr una brezeta d tramontana al taiav ‘l mus com na rasoiata. Antò i dè un t’rmon, po’ i mis nà s’ciampeta ‘n tel foch, e pian pianin i s’aviò vers ‘l fil che i fris’ciav pian mentr i rosgav ‘l bloch. I montò su p’r la scaleta, e quand  i fù ‘nzim al pez, tut giazat com nà lastra d vetr, i fè p’r andar a v’der ‘l lived d d’acqua drent a la bota.
Al fù un moment!……Un sguidon….Un’url….Un colp….Sech, cativ, propri su la copareda, un rumor com d’un broch che i s spach!…..Po’ ‘l silenzi.
I armas lì dov ier pistat, i brazi aperti com Crist ‘n croza, i oci, fissi ‘nt’l vot, a mirar le stede.
Al pian ‘ntant, tute le campane al sonav’n a festa. Ader mezanota!
Ader nat ‘l Bambin Gesù.


Volpi Mario
PER NON DIMENTICARE

Racconti di questa rubrica

Ti è piaciuta questa sezione, per lasciare un commento

Versione audio del racconto
CarraraOnline.com
CarraraOnline.com
Torna ai contenuti