L' barbon - carraraonline.com

Sezione a cura di Mario Volpi
Vai ai contenuti

L' barbon

Sol p'r noialtri
File Audio del Racconto

Spetta/le Redazione
Nel mondo animale, la scelta del partner tra i due sessi, avviene principalmente in base a un primo esame visivo, di solito l'individuo più attraente viene scelto. Anche tra l'animale "uomo" spesso viene adottato questo sistema per giudicare qualcuno, ma non avendo le capacità degli animali, il giudizio viene spesso falsato da nostri pregiudizi mentali, che secoli di cosiddetta "civiltà" ci hanno inculcato. Per la maggior parte di noi il "diverso" deve per forza essere anche stupido, o comunque inferiore, e quindi ci sentiamo autorizzati a trattarlo con sufficienza se non peggio.

22 marzo 2013

Adèr la stimana prima d Natal e adèr domenica, ‘l temp, dop tant’acqua, al parev che i s fuss p’ntit, e i aves decis d’argalar na zornata d quele da cartulina.
La tramontana ‘n tla nota, a d’avev bufat a pù a n poss, spazand con un granaton d’aria z’lata, tute le nuv’le, col risultat, che il sol i ser fat arv’der, ma dat ‘l fred, l’unic lavor che i riusiv a scaldar, ier ‘l cor. Me a son com na zorteda, e com aiè un brisin d sol a dai fora, e mò a m god la sulacina ‘n punta al molo, e a dev dir che ie un spetacolo.
Le cave al par’n stampate, e al par’rè d tocarle slungand na man, d’aria, adè talmente ciara, che a m par d disti’ngur anch i badon ‘ntì ravaneti. ‘L Port ie ferm. Sol un barch iè atracat a la banchina, i ha lo scaf piturat d ner, e la parta d sopr al dovev eser stata bianca, prima che la ruz’na ai metess su cà. Dal fumaiol i sput, tossend, un fum grizastr, che sub’t i svanis, squasi i avess temenza d sporcar il linzol zelest stes ‘ntel zel.
Le mancine zade, al parn un branch d tarabusi quand i dorm’n su na gamba. Do gabian i zerc’n d difend’rs dal zel sbarufand la piume, posati su un lampion. ’L Padret’ern i dev aver decis d far na bucata p’r sgromar ‘l mond, e i ha ‘nzà mis ‘l turchinet ‘n t d’acqua; cussì ‘l mar, calm, liss com d’oli, i è d’un blù cussì ‘ntens che a d’avev mai vist. Ogni tant la tramontana con na bufata pù forta, ai sguid sopr, e a i fa un’n’crespatura, squasi al voless p’tinarl, per farl ancha’mò pù bel! Adè squasi mez’dì e a decid d tornar vers cà, su la pasegiata al par d’eser ‘n via Roma, da tante caruzine e pasegini che aiè, pinti da mà o bà, tronfi com piti e tuti ‘n montura, qualc’d’un i tegn p’r la man i ninin pù picli, con i nasin e i cocheti rossi dal fred, tuti inbacucati in giache e tutine d mili colori. Arivat squasi al Far, aio vist un capaned d zenta arent al monument di marinari, e a cuminzò a s’ntir anch na musicheta che lì per, lì, a p’nsav che al v’nis da qualch radiulina, ma po’ aio vist un che i sonav ‘l viulin. Ier un omon‘nfagotat ‘nt’un capot talmente lis e artopat che i dovev aver pù ani che ‘l primo top del Cafaz, ‘l mus ier ‘ncurnizat da na barba brizolata che a s’univ ‘n t’un t’t’un con i capedi, ligati dret la copareda, ‘n t’un cudin t’nut stret con un elastizin. Le man ad’ern coperte da un par d guanti senza  diti, ‘n testa un caped da Babbo Natal, che un par d secli fa i dovev eser stat ross, ma che mò, i tirav d pù al maton sporch. Quel che al fev f’rmar la zenta ader il cagnet che i avev arent ai pè. Ier un cuciolot d bastardin, i avrà avut si, e nò, do mesi, bianch, con dle mace nere com se i fuss passat drent a una carbonara, ier stranat mez adurmit arent a la custodia del viulin, che, al serviv anch da caseta p’r l’elemos’na, con un carted d carton atacat al cod con su scrit “GRAZI” e me a no capit se la “E” al mancass p’rcos chi i d’avev scrit ier un mic, opur se al fuss f’nit ‘l carton. La zenta al fev i cumplimenti al can, ma a s’n fregav del padron, vist che drent la custodia a i sarà stat si e no, trenta z’ntesimi. Ma lù al parev che a n’importass, i continuav a sonar cla musica m’lensa, con un mez suris stampat sul mus, mentr i oci, iern spersi a mirar un punt ‘nt’el vot. Me a stev p’r andar via quand a vidi arivar do signore d’una certa età, tute ‘m’pelizate, cariche d anedi e codane, com un albr d Natal. Con un urlet a s chinar’n a far i cumplimenti al can, una al diss:” Sembra quello della carica dei centouno! Non ti pare?”  C’d’altra dop esers frucata ‘n sacoza, al tirò fora un euro e al butò drent la custodia dizend:” dai suona la carica dei centouno!” Ma d’omon al parv che i n’aves nemanch s’ntit p’rcos i cuntinuò la solita musicheta senza far na piega. “Mi hai sentito?” Al diss la signora con voza stridula, po’ zirata vers l’amica al replicò” che gente! E poi vogliono l’elemosina!” C’d’altra com se ‘l barbon i fuss invisibile al diss” lascia perdere! Forse non ne è capace… Oppure!...” E a s tocò la testa con un dit, com p’r dir che ier sem. La musica m’lensa, al smis d colp, e subt dop un’orchestra ‘ntera a s mis a sonar. Le note al v’niv’n fora dal viulin com na cascata, al pistan’n p’r tera per po’ spriciar altre note, come i gozi d’acqua ‘n t’una fontana, ‘l viulin i pasav dal ris al piant, dal lament, a l’alegria, mentre i diti drent a chi guanti scalcagnati, i badav’n su le corde che se i fusn ognun p’r propri cont. D’archet i sguidav sul pontized, tant svelt che me air sicur, che prima o po’ i avrè piat foch. Lu i teniv i oci ciosi, sul mus na smorfia, com se i sufriss, mentre nonostante ‘l fred, gozlon d sudor i bagnav’n la fronta.

Un omet arent a me i dis sot’voza a la moia: “ questi ien i “Caprici d Paganini”, com ‘l disch che abian a cà, ma luchì ie mei!” ‘N do m’nuti, aier pien d zenta a s’ntir cla musica divina, i bagaron i pistav’n drent a la custodia com se al piovess, anch ‘l cuciolot i s’er sviat e mò i mirav spav’ntat, prima ‘l so padron, e po’ tuta la zenta che i avev a la tonta. D colp com ader cuminzata la musica al f’nì, dop un moment d silenzi la zenta al cuminzò a bater le man, qualc’d’un i zercò anch ‘l biss.
Ma l’omon, senza dir na parola i arguaiò can e custodia, e i s’andò. Le dò signore rosse com pomate da la v’rgogna, al te’ntar’n d sgusar via, ma me, a m potè trat’nir dal dir a voza abastanza alta p’rcos a m potes’n s’ntir “ non è l’abito che fa il monaco!…ne tant’manch la signora!” A diss ridend, con na punta d cativeria.


Volpi Mario

Racconti di questa rubrica

Ti è piaciuta questa sezione, per lasciare un commento

File Audio del Racconto
CarraraOnline.com
CarraraOnline.com
Torna ai contenuti